A Táboa Periódica na era do Machine Learning

Abstract

Cando se me propuxo escribir este capítulo acerca do que significa para min, un químico que desenvolve modelos e traballa con computadores, a táboa periódica, non sabía moi ben por onde empezar. Con todo, pronto descubrín que Mendeleev, deseñador da táboa periódica no ano 1869 o que fixo foi racionalizar, ordenar e mesmo predicir os elementos químicos, accións que tamén leva a cabo un químico teórico cando pretende entender por exemplo as reaccións químicas, como é o meu caso. Por outra banda, a táboa periódica é como unha ecuación matemática que condensa moito do coñecemento existente sobre os elementos químicos. A maioría dos químicos e físicos teóricos que traballan con átomos ou moléculas non fan nin máis (nin menos) que iso: constrúen modelos (escritos na linguaxe matemática) que codifican coñecemento e teñen a capacidade de predicir comportamentos futuros.