Vlera e të mësuarit përgjatë tërë jetës sipas koncepteve Islame

Abstract

Të mësuarit përgjatë gjithë jetës është prej parimeve të fesë Islame. Nëse i japim një vështrim Kuranit Famëlartë këtë do ta hasim në shumë ajete të tij, siç janë: “O Zoti im shtoma diturinë” (Taha: 114), pastaj ajeti “A janë të barabartë ata që dinë dhe ata që nuk dinë?! Vetëm njerëzit e mençur i pranojnë këshillat” (Ez-Zumer: 9). Gjithashtu edhe shumë thënie pejgamberike aludojnë në rëndësinë dhe vlerën e të mësuarit. Prej tyre mund të potencojmë hadithin e Pejgamberit a.s. në të cilin thotë: “Ai person i cili del nga shtëpia me qëllim të kërkimi të diturisë, ai në realitet llogaritet si një person i cili ka dal për hire të Allahut dhe ashtu do të llogaritet derisa të kthehet” Shembullin më të mirë ne e kemi edhe në gjeneratat e hershme të dijetarëve, si dhe ato pas tyre në vazhdimësi, ku hasim shumë dijetarë të cilët kanë bërë shumë sakrifica vetëm e vetëm që të arrijnë për të mësuar ndonjë dije të cilën nuk e kanë ditur më parë. Nëse kthehemi në historinë Islame vërejmë se përkushtimi i myslimanëve ndaj dijes nuk ka qenë vetëm në fushën fetare, mirëpo ato gjenerata ishin të përkushtuara edhe në dijet dhe shkencat tjera. Fakulteti i Studimeve Islame është institucion i pavarur edukativo-arsimor dhe hulumtues-shkencor, i cili organizon studime universitare dhe pasuniversitare për studentët e interesuar për të përfituar nga fusha e teologjisë Islame. Strategjia e Fakultetit të Studimeve Islame -FSI, përmes organizimit të studimeve universitare po edhe pasuniversitare, është që diturinë dhe njohuritë bashkëkohore t’i distribuojë përmes aktivitetit të mësimdhënies, të studimeve dhe hulumtimeve, si dhe të arsimojë kuadro të niveleve të ndryshme. Me këtë kumtesë kemi për synim të sqarojmë vlerën dhe rëndësinë e të mësuarit përgjatë tërë jetës si dhe praktikat të cilat i ofron FSI në fushën e studimeve teologjike në Kosovë dhe më gjerë.