Sobre a “liberdade de elección” e o “equilibrio lingüístico” no ensino: análise empírica do discurso parlamentario galego sobre os decretos de distribución de linguas

Abstract

O obxectivo principal deste traballo é realizar unha análise sobre o fundamento empírico dos argumentos que se empregaron en cinco debates parlamentarios arredor dos Decretos 124/2007 e 79/2010, os dous últimos que tratan a distribución de linguas no ensino non universitario de Galicia. Para comprender os motivos das diferenzas ideolóxicas e políticas que separan ambos os dous textos, elaboramos un estudo crítico de cinco debates parlamentarios en que se discuten estas cuestións e contrastamos os argumentos achegados con outras fontes secundarias de consulta, de maneira que poidamos comprender o contexto do debate sobre as linguas que se xerou en Galicia entre os anos 2007 e 2010.