Teuta Shala-Peli, “Drishti në Mesjetë”, Instituti i Historisë “Ali Hadri”-Prishtinë, Prishtinë 2016, 345 f.

Në mesin e botimeve më të reja të studiuesve të Institutit të Historisë “Ali Hadri”, është vepra e dr. Teuta Shalës me përmbajtje specifike dhe të rëndësishme për historinë mesjetare shqiptare me titull “Drishti në Mesjetë”. Ky studim monografik që po i prezantohet lexuesit, ka për objekt studimi qytetin mesjetar të Drishtit, duke përfshirë aspekte të ndryshme të zhvillimit historik, shoqëror, ekonomik, kulturor, religjioz e politik të këtij qyteti, që nga koha e formimit si qytet e deri tek rënia e tij nën sundimin osman. Qëllimi i kësaj monografie, ashtu siç theksohet edhe nga autorja, është që të vë në pah rëndësinë dhe rolin e këtij qyteti mesjetar, si dhe transformimin e tij nga një qendër dikur e rëndësishme, në një fshat të harruar dhe të lënë nën mëshirën e fatit.