E drejta penale Shqiptare në periudhën 1939-1945

Objekt trajtese e këtij punimi është zhvillimi i legjislacionit penal shqiptar në periudhën 1939-1945. Arsyeja e përzgjedhjes së kësaj periudhe është se, ende Shqipëria e fillimit të mijëvjeçarit të ri vazhdon të ndikohet nga ngjarjet dhe çështjet e kësaj periudhe që përkon me Luftën e Dytë Botërore. “Për të kuptuar shqiptarët e vitit 2000 e tutje, është e rëndësishme të zbulosh kush kanë qenë ata gjatë viteve 1939-1945”, shkruan profesor Bernd Fischer në një nga librat e tij, duke dashur të evidentojë në këtë mënyrë sa rëndësinë, por dhe diskutimet e pranishme mbi këtë periudhë lidhur me krijimin e imazhit të shqiptarëve si popull dhe si shtet.Ky punim synon të sjellë nëpërmjet gjurmimit, analizës, krahasimit e shpjegimit në mënyrë shkencore, legjislacionin penal, por dhe më gjerë sistemin ligjor dhe gjyqësor shqiptar, nën ndikimin e rrethanave historike të kohës.