Problematika në mësimdhënien e historisë së filozofisë

Abstract

Me trajtimin e problematikave në mësimdhënien historisë së filozofisë tentojmë të kapim mangësitë dhe problemet në mësimin e shkencave shoqërore dhe humane  në shkolla të mesme dhe medrese. Pra, synojmë të nxjerrim në pah disa probleme lidhur me funksionin formues të qytetarit aktiv që duhet të luajë lënda e filozofisë në tërësinë e kulturës së përgjithshme që jepet në shkollat e mesme e aq më tepër në medresetë e Shqipërisë. Një ndër problemet kryesore që pengon realizimin e funksionit formues të qytetarit aktiv është zëvendësimi i mësimdhënies së filozofisë me atë të historisë së filozofisë në nivelin e arsimit të mesëm në përgjithësi (përfshirë këtu edhe arsimimin në medresetë), i cili ka zëvendësuar formimin me anën e trajtimit të problemeve kryesore të filozofisë me përshkrimin e zgjidhjeve që u janë dhënë atyre në kohë dhe vende të caktuara evropiane nga filozofë të ndryshëm. Gjithashtu, një problem serioz në mësimdhënien e historisë së filozofisë, është ai i shtjellimit të saj nën optikën e një këndvështrimi vetëm sipas kulturës perëndimore e kjo paraqitje nxjerr në pah dy probleme: 1. Lihet mënjanë kontributi i mendimit, dijes dhe kulturës islame (Nëse nuk thuhet kjo në medrese, ku mund të presim të thuhet vallë?!), por gjithashtu edhe kontributi që kanë dhënë edhe qytetërime të tjera si ai kinez, indian, persian etj., që përbën një kontribut të madh në historinë e njerëzimit. 2. Paraqitja sipas kësaj kulture krijon përshtypjen, sikur ekziston një përplasje midis shkencës dhe fesë, ndërkohë që qytetërimi islam ka treguar që nuk ka një përplasje të tillë. Po ashtu ka edhe studiues perëndimorë që e kanë mohuar këtë përplasje. Këto janë koncepte shumë të rëndësishme që duhet t’ju sqarohen nxënësve të medreseve. Një problem tjetër që evidentohet është trajtimi pothuajse injorues i rolit që ka luajtur qytetërimi islam si një urë kalimtare nga qytetërimi greko-romak në atë evropiano-perëndimor, si nxitësi kryesor i të ashtuquajturës Rilindje Evropiane.