Botimi dhe përkthimi i librave e teksteve më të rëndësishme të sires në gjuhën shqipe

Gjatë përhapjes dhe zhvillimit të kulturës islame ndër shqiptarët, ulemaja shqiptare ka dhënë kontribut të çmuar në kultivimin dhe ruajtjen e kulturës dhe traditës fetare islame te shqiptarët. Ata, përveç aktiviteteve të ndryshme fetare, kontribut të veçantë kanë dhënë duke përkthyer fillimisht e pastaj duke shkruar libra e tekste të ndryshme islame në gjuhën shqipe. Në fillim këta krijues kanë shkruar dhe krijuar vepra në gjuhën shqipe, me alfabet arab –osman (nga fundi i shek. XVII deri në shek. XIX). Ndërsa gjatë shekullit që kemi lënë pas, veçmas nga vitet e 50-ta e deri në ditët e sotme, panë dritën e botimit një numër i konsiderueshëm i librave të fushës së Sires (jetëshkrimit të Pejgamberit a.s.). Ata duke parë rëndësinë që ka biografia e Muhamedit a.s. për besimtarët shqiptar islam si dhe shëmbëlltyra e tij, si model për mbarë botën dhe njerëzimin, me zell të madh kanë shkruar e botuar libra e shkrime për figurën dhe personalitetin e tij. Duke qenë se nga viti 1996, e ligjëroj dhe e mbulojë këtë fushë në Fakultetin e Studimeve Islame, dhe duke qenë se për këtë lëmi kam filluar të publikoj nëpër revista të ndryshme qysh herët, e pashë të arsyeshme që për këtë konferencë shkencore të paraqitem, me temën: Literatura Islame në Gjuhën Shqipe 1945 - 2022, pikërisht t’i rrekem kësaj teme por me një trajtim dhe qasje tjetër. Mendojmë se pozita dhe niveli i sotëm arsimor dhe intelektual i besimtarëve myslimanë shqiptar, e sheh të nevojshme njohjen direkte të historisë së lindjes dhe shtrirjes së fesë islame, njohjen me jetën dhe predikimet e profetit Muhamed a.s., me botimet e autorëve të shquar lindorë e perëndimorë kushtuar biografisë së Pejgamberit a.s.. Por, mbi të gjitha për shqiptarët e besimit islam kanë interes të veçantë botimet në gjuhën amtare kushtuar jetës dhe historisë së Pejgamberit a.s.