O adxectivo cunqueiriano na narrativa galega

Abstract

No presente traballo pretendemos trazar unha panorámica da evolución do adxectivo «cunqueiriano» na narrativa galega dende os anos setenta do século pasado ata a actualidade. Así podemos comprobar como a influencia do gran escritor mindoniense pasa por diferentes fases: a identificación co realismo máxico nos oitenta, como vía para a creación dunha alegoría nacional que permita representar un pasado irrepresentable; a apropiación, na década dos noventa, da memoria histórica a través da investigación etnográfica; ou a fidelidade extrema na reprodución hipertextual das súas estratexias narrativas e estilo, xa na primeira década dos dous mil. Por último, indícase que na actualidade existe un uso difuso do adxectivo «cunqueiriano», escritor ao que se cita como modelo de autor biliterario con ampla presenza no xornalismo de expresión castelá, e tamén como figura clave, esgazada da tradición nacional, na formación literaria dos narradores das novas xeracións.