Evaluering av eigen dialekt og aktuelle faktorar i den dialektale sosialiseringsprosessen

Abstract

Prosjektet Talemålsendring hjå ungdom på Voss (TUV) vart starta opp våren 2001. Med i prosjektet deltar alle avgangselevane ved Voss gymnas som gjekk ut våren 2001 og alle elevane i ein andreklasse som gjekk året 2001-2002. Prosjektet har som mål å granska talemålet hjå ungdomen på Voss ved byrjinga av eit nytt tusenår. Elevane som gjekk ut våren 2001 har delteke både i eit lydopptak og i ei skriftleg spørjegransking, medan elevane som gjekk i andreklassen skuleåret 2001-2002 har vore med på ei skriftleg spørjegransking. Opptaket som vart gjort med avgangselevane våren 2001 var av ein samtale mellom to og to elevar der intervjuaren var ei vossajente som sjølv hadde gått ut av Voss gymnas to år tidlegare. Opptaket vart gjort i eit redigeringslokale ved Voss gymnas der m.a. Radio Voss tidlegare heldt lokale og som musikklina ved gymnaset har nytta. Samtalen hadde som føremål å framskaffa mest mogleg 'naturleg' tale, og intervjuaren hadde som oppgåve å halda samtalen ved like. For å få elevane til å samtala mest mogleg 'naturleg', vart det introdusert fire ulike emne etter som samtalen gjekk fram: barndom, hobby, aktuelt lokalt tema og russefeiring.